معركتي

من ساعت ما فتحت المدونه دي بكتب فيها وانا اهتمامي الاول بيها واحنا ياجماعه داخلين علي امتحانات حسيت فعلا ان كل واحد عنده شويه معارك صغنونه في حياته بتبتدي من انه مين وعايز ايه وبيعمل ايه عشان يوصل للي هوه عايزه وناوي يخلص الي هوه عايزه امتي؟ واسئله كتير اوي ........ قصدي معارك كتير اوي بس المعارك دي في حياه كل واحد بتكون درجات يعني الي اهم معركه في حياته يكون اروش واجمد واحد في الدنيا والي معركه حياته يكون اكتر واحد معاه بنات في الكليه والي معركه حياته يكون اكتر واحد مشهور في الكليه اوفي اي مكان تاني.دول نوع مش هعلق عليه لانه احسن تعليق عليه لا تعليق.
طب مافي معارك تانيه هيه الواحد يخلي عنده حبه دم ويزاكر اصل المعركه دي مش هتغيره هوه بس يعني مش معركه نتائجها انانيه لا دي معركه بجد لو فاز فيها هيخدم ناس كتير اوي من ضمنهم نفسه بجد معركه تستاهل الواحد يطلع فيها كل اسلحته مش عشان يحارب الجنود الغلابه الي معاه في نفس الكليه لا بس عشان يمكن لو انتصر فيها علي نفسه هيكون بجد قائد للجيش الي هوه فيه او بمعني ادق واحد محترم بيعرف يغير حاجه في الحاجات الكتييييييييييييييييييييييييييير اوي الي عايزه تتغير في حياتنا والناس سايباها علي امل انها تغير نفسها .
لو تغاضينا عن كلمه معركه وجنود وكده,بجد الواحد لازم يكون ليه هدف عايز يوصله ويكون الهدف ده بيموت نفسه عشان يحققه لانه اما يحققه بجد النفع هيعود علي الناس كلها بجد انا مش بكتب البوست ده عشان الناس الي هتقرا اه عشانهم بس عشاني انا كمان ساعات الواحد فعلا بينشغل عن القضيه المهمه في حياته بقضايا اخري يمكن مهمه بس مش بنفس الاهمه ولا بنفس انها ليها وقت محدد زي مثلا الانشغال ابالمدونه دي مع ان فاضل علي امتحاناتي اقل من 25 يوم .
حاجه اخيره عايزه اقولها بجد ايات وكلمات واحاديث واحده صاحبتي قالتهالي بجد حسسوني ان ربنا جميل اوي وبجد الواحد لو عمل الي عليه هيحقق كل الي هوه عايزه.
(ان الله يرزق من يشاء بغير حساب)
(من عمل صالحا من ذكر او انثي فلنحيينه حياه طيبه)
وما كان ربك بظلام للعبيد)
الحديث الرائع(انا عند ظن عبدي بي )
,,,,,,,,,,,,(تفاءلوا بالخير تجدوه)
والايه الاخيره الي ممكن تكون غريبه في الوضع ده وهي(ولقد اخذناهم بالبأساء والضراء لعلهم يتضرعون)
يعني ممكن ربنا يجيب لنا امتحان صعب, حاجه تزعلنا اوي ,اي حاجه ممكن توقفنا عن الهدف بتاعنا او من وجه نظرنا كده بس ربنا بعتها لينا في الاصل عشان نرجع له ونعرف اد ايه اد ايه احنا محتاجين له(لعلهم يتضرعون) وبجد ده ماعاذ الله مش لانه عايز يحس بكده لا بس لانه فعلا بيحبنا وبجد عايز يدنا كل حاجه احنا نفسنا فيها بس يمكن فعلا كل حاجه ليها وقتها المناسب ,بجد انا بحب ربنا اوي.
المهم دلوقتي الامتحانات داخله والواحد عايز يرجع تاني للمعركه الاساسيه في حياته لانها هيه الاهم حاليا في الوقت الحالي ولانها هيه الي لو مش اتعملت دلوقتي الخساره هتكون اكبر
هحاول اطبق الكلام ده علي نفسي واني ابص علي المعركه الاساسيه في حياتي وحاليا هيه مزاكرتي وبجد مش هكتب تاني الا اما امتحاناتي تخلص ان شاء الله واتمني بعد اما ادخل تاني الاقي البوست ده حد علق عليه واتاثر بيه
جزاكم الله خيرا